KQZ-ja certifikon grupin e tretë me 39 subjekte politike dhe 380 kandidatë

Prishtinë, 16 Gusht 2025

Komisioni Qendror i Zgjedhjeve (KQZ) ka vazhduar me procesin e certifikimit të subjekteve politike dhe kandidatëve që do të marrin pjesë në Zgjedhjet Lokale për Kryetarë të Komunave dhe Kuvendet Komunale.

Në mbledhjen e së shtunës, KQZ-ja mori vendime për certifikimin e grupit të tretë me gjithsej 39 subjekte politike, prej të cilave 25 iniciativa qytetare dhe 14 kandidatë të pavarur, për pjesëmarrje në këto zgjedhje.

Në rend dite për certifikim ishte edhe iniciativa qytetare “Lidhja e Prishtinës” me 56 kandidatë për Kuvendin Komunal në Prishtinë, por ajo nuk arriti të marrë së paku tetë vota, pasi u kundërshtua nga përfaqësuesi i LDK-së në KQZ, Sami Hamiti. Ai shfaqi vërejtje për ngjashmërinë e emrit me atë të Lidhjes Demokratike të Kosovës.

“Unë kërkoj që kjo mos të kalojë sot. Duhet të kërkohet nga ajo iniciativë qytetare që të ndryshojë emërtimin, sepse është sinonim i pastër i brendit të LDK-së. Gjithçka është identike me atë të vitit 2021, që po ashtu nuk e kemi certifikuar,” tha Hamiti.

Ndërkaq, rekomandimi për subjektin tjetër “Lëvizja për Bashkimin e Shqiptarëve” u tërhoq, pas vërejtjeve se duhet rishikuar emërtimi për shkak të një gabimi gjuhësor – ku në fjalën “shqipëtarëve” është përdorur një “ë” e panevojshme.

Sipas të dhënave të KQZ-së, numri i përgjithshëm i kandidatëve që përfaqësojnë këto subjekte është 380, prej të cilëve 25 kandidatë për Kryetarë të Komunave dhe 355 për anëtarë të Kuvendeve Komunale.