Vrasje e trefishtë në Gjilan: Tre në arrati, një i arrestuar, dy të plagosur

Gjilan, 10 gusht 2025 – Tre persona janë vrarë dhe dy të tjerë janë plagosur nga të shtënat me armë zjarri që ndodhën të dielën në mesditë, në rrugën “Ibrahim Rugova” në Gjilan, kanë konfirmuar autoritetet kosovare.

Fillimisht, Policia e Kosovës njoftoi për dy viktima të konstatuara në vendngjarje, ndërsa të plagosurit u dërguan në Qendrën Emergjente të Gjilanit. Më vonë, nga Spitali i Gjilanit u bë e ditur se një prej të plagosurve ndërroi jetë, një tjetër u transferua në QKUK në gjendje të rëndë, ndërsa një pacient u pranua në repartin e Ortopedisë.

Policia është në kërkim të tre të dyshuarve – Mefail Shkodra (53), Edonis Shkodra (25) dhe Engjull Shkodra (22) – për të cilët dyshohet se kanë kryer veprën penale të “vrasjes së rëndë”. Drejtori i Policisë Rajonale në Gjilan, Agron Rukiqi, bëri të ditur se janë lëshuar urdhër-arreste, është kërkuar bashkëpunim ndërkombëtar, janë lajmëruar pikat kufitare dhe janë kryer kontrolle në tri lokacione. Në vendngjarje është arrestuar edhe një person tjetër, i cili po hetohet për lidhjen e mundshme me rastin.

Prokurori i rastit, Isuf Sadiku, tha se i dyshuari kryesor, Mefail Shkodra, ka një dosje të gjerë kriminale me mbi 30 vepra penale, përfshirë sulm, prishje të rendit, fajde, mashtrim, kanosje, shantazh, detyrim dhe pjesëmarrje në grup kriminal të organizuar.

Ngjarja ka nxitur reagime të forta nga autoritetet lokale. Kryetari i Gjilanit, Alban Hyseni, u zotua se “nuk do të lejohet që dhuna të marrë vend në jetën e përditshme” dhe shprehu ngushëllime për familjet e viktimave. Kryetari i PDK-së, Memli Krasniqi, e cilësoi rastin si “alarm për rritjen e pasigurisë dhe kriminalitetit” në vend.