Vetëvendosje prezanton kandidatët për tri komunat veriore për zgjedhjet e 12 tetorit

Lëvizja Vetëvendosje ka zyrtarizuar sot kandidatët e saj për kryetarë në tri komuna në veri të vendit, duke nisur kështu fushatën për zgjedhjet lokale të parashikuara më 12 tetor.

Në Komunën e Leposaviqit, kandidati është kryetari aktual, Lulzim Hetemi, i cili, sipas VV-së, ka dëshmuar guxim dhe vendosmëri në menaxhimin e komunës, duke qenë pranë qytetarëve çdo ditë dhe duke e udhëhequr me integritet.

Për Komunën e Zubin Potokut, partia ka propozuar Vedat Mehmetin, kryesuesin e kuvendit komunal, i cili vlerësohet për vizionin e tij për zhvillimin e komunës përmes bashkëpunimit institucional dhe zbatimit të ligjit.

Ndërsa për Komunën e Zveçanit, kandidon Fetah Peci, i përshkruar nga Vetëvendosje si zëri i bashkimit dhe zhvillimit, me përvojë dhe njohje të thellë të nevojave të banorëve lokalë, i vendosur për të thyer izolimin dhe për të hapur mundësi të reja.

Në prezantimin e kandidatëve morën pjesë kryeministri në detyrë dhe kryetari i Vetëvendosjes, Albin Kurti, Sekretari i Përgjithshëm Alim Rama, koordinatori i qendrave dhe deputeti Salih Zyba, si dhe deputetët Armend Muja, Agim Bahtiri e Arjeta Fejza. Të pranishmit shprehën mbështetje të plotë dhe të parezervë për secilin prej kandidatëve.

Sipas komunikatës së VV-së, këta kandidatë paraqesin “garancinë se në veri do të vazhdohet ndërtimi i institucioneve funksionale, sjellja e investimeve që ndikojnë drejtpërdrejt në jetën e qytetarëve dhe garantimi i një qeverisjeje që respekton ligjin e punon për të gjithë”.

Vetëvendosje e mbylli prezantimin me mesazhin se 12 tetori do të jetë një ditë vendimtare për të ardhmen e komunave veriore, duke e përshkruar fushatën si një përpjekje “bashkë përpara – për komunat tona, për qytetarët tanë, për të ardhmen tonë”.