Demantohet Ministria e Drejtësisë serbe – Haxhiu: Popoviqi pranoj fajin me vullnet të plotë, jo nën presion

Prishtinë, 09 gusht 2025

Ministrja në detyrë e Drejtësisë, Albulena Haxhiu ka reaguar pasi shteti i Serbisë tha se zyrtari i tyre i arrestuar në Kosovë, Igor Popoviq ka pranuar fajësinë nga presioni.

Haxhiu tha se shteti i Serbisë, jo vetëm që keqpërdor vizitat zyrtare në vendin tonë përmes zyrtarëve të saj duke nxiturr urrejtje dhe përçarje, por vazhdon propagandën e saj edhe pas marrëveshjeve me institucionet e Kosovës për pranim të fajësisë si në rastin e Igor Popoviq.

“Ministria e Drejtësisë së Serbisë paska dalë me akuzë tjetër të rreme duke thënë se zyrtari i saj Igor Popoviq e ka pranuar fajësinë nën kushte presioni. Por, në videon më poshtë mund ta shihni se jo vetëm i akuzuari Popoviq, por edhe vet avokati i tij theksojnë se me vullnet të plotë është bërë si pranimi i fajësisë ashtu edhe marrëveshja”.

“Serbia me kutin e saj gjykon edhe Republikën e Kosovës, por ajo duhet ta kuptojë se Republika e Kosovës është vend demokratik, ku sundon drejtësia dhe dinjititeti njerëzor janë të garantuara e ku pushtetet janë qartësisht të ndara”, ka shkruar Haxhiu në një postim në Facebook.