Qeveria e Kosovës miraton shqyrtimin e shpronësimeve për ndërtimin e urës mbi lumin Ibër

Prishtinë, 8 gusht 2025

Qeveria e Kosovës ka mbajtur më 8 gusht një mbledhje elektronike, gjatë së cilës janë marrë tri vendime. Vendimi i parë ka të bëjë me miratimin për shqyrtimin e mëtejmë të kërkesës me vetiniciativë për shpronësimin e pronave të paluajtshme që nevojiten për ndërtimin e urës mbi lumin Ibër, që lidh Mitrovicën e veriut me atë të jugut.

“Në mbledhje u miratua shqyrtimi i mëtejmë i kërkesës me vetiniciativë për shpronësimin për interes publik të pronave të paluajtshme, të cilat janë të domosdoshme për realizimin e Projektit Infrastrukturor për Interes Publik – Ndërtimi i Urës mbi lumin Ibër që lidh Mitrovicën e veriut me atë të jugut”, thuhet në njoftimin e Zyrës së Kryeministrit.

Po ashtu, Qeveria ka vendosur për përcaktimin e zonave të shërbimit për ofruesit e shërbimeve të ujit në Kosovë dhe ka miratuar ndryshimin e statutit të Kompanisë Rajonale të Ujësjellësit “Mitrovica” Sh.A, bazuar në vendimin e bordit të drejtorëve.

Në lidhje me këtë projekt, Prokuroria Speciale ka bërë të ditur se hetimet që po zhvillohen për kontratat e ndërtimit të urave nuk kanë të bëjnë me kundërshtimin e projektit, por me përmbushjen e detyrimeve ligjore.

“Prokuroria Speciale njofton opinionin publik se nuk është në kompetencën e saj të vlerësojë apo aprovojë projekte infrastrukturore. Roli i saj është të veprojë mbi bazën e ligjeve në fuqi, në rastet kur ekzistojnë dyshime për keqpërdorim të fondeve publike. Aktualisht, pesë prokurorë të angazhuar nga PS janë duke trajtuar afërsisht 2 mijë kontrata njëburimore”, thuhet në komunikatën e 10 korrikut 2025.

Bazuar në këtë, Prokuroria Speciale ka autorizuar Policinë e Kosovës që të ndërmarrë veprimet e nevojshme hetimore për të konstatuar gjendjen faktike, në përputhje me Kodin e Procedurës Penale.

“Hetimet për kontratat e ndërtimit të urave në Mitrovicë nuk kanë të bëjnë me kundërshtimin e projektit, por janë në funksion të mbrojtjes së interesit publik dhe sundimit të ligjit, në mënyrë që të sigurohet një administrim i drejtë dhe ligjor i burimeve publike”, përfundon njoftimi.

Më 1 korrik 2025 është vënë guri themeltar për ndërtimin e dy urave të reja mbi lumin Ibër. Projekti po realizohet në bazë të një memorandumi bashkëpunimi ndërmjet Ministrisë së Mjedisit, Planifikimit Hapësinor dhe Infrastrukturës me Komunën e Mitrovicës së Veriut dhe atë të Jugut.