Përplasje muzikore në Mitrovicë: Jazz nga skena, muzikë popullore serbe nga altoparlantët

Mitrovicë e Veriut, 8 gusht 2025

Mitrovica International Jazz Days, festivali i njohur muzikor që promovon përfshirjen dhe dialogun artistik, është planifikuar të mbahet nga data 8 deri më 10 gusht 2025 në Mitrovicën e Veriut. Edhe pse organizatorët po bëjnë përpjekje të mëdha që gjithçka të zhvillohet në frymën e artit dhe bashkëjetesës, përgatitjet për festivalin tashmë janë përballur me sfidat e para në terren.

Siç shihet në vendngjarje, montimi i skenës dhe përgatitjet teknike në qendër të Mitrovicës po zhvillohen në një atmosferë tensioni. Organizatorët kanë filluar me vendosjen e skenës dhe testimin e pajisjeve të zërit, mirëpo një grup qytetarësh nga komuniteti serb ka filluar të mblidhet pranë hapësirës ku do të mbahet festivali, duke shprehur pakënaqësi për prezencën e këtij aktiviteti.

Sipas pamjeve dhe dëshmive të qytetarëve, në momentin kur teknikët e festivalit kanë filluar të lëshojnë muzikë jazz nga skena, të pranishmit kanë reaguar duke lëshuar muzikë serbe nga altoparlantët përreth, me qëllim të dukshëm për ta zëvendësuar dhe penguar festivalin. Më pas ka pasuar një përballje zërash nga të dyja palët, gjë që ka rritur edhe më shumë tensionet në qendër të qytetit.

Në pamjet e regjistruara në terren dëgjohet një grua duke bërtitur ndaj pjesëtarëve të Policisë së Kosovës, duke kërkuar ndërhyrje. Në sfond dëgjohen edhe komente të disa qytetarëve që shprehin qartë kundërshtimin ndaj mbajtjes së festivalit në atë lokacion. Megjithatë, për shkak të të drejtave autoriale të portalit, zëri nga videoja e publikuar në rrjetet sociale do të çaktivizohet përkohësisht.

Festivali Mitrovica International Jazz Days, gjatë vitit të kaluar, ka promovuar mesazhe paqeje, dialogu dhe bashkëpunimi ndëretnik përmes artit, por situata aktuale tregon se organizimi i ngjarjeve të tilla ende përballet me pengesa në një nga pikat më të ndjeshme të Kosovës.