Kosova kërkon nga SHBA blerjen e helikopterëve

Prishtinë, 17 tetor 2026 16:59

Kosova ka kërkuar nga Shtetet e Bashkuara të Amerikës që të diskutohet mundësia e blerjes së helikopterëve për Forcën e Sigurisë së Kosovës (FSK).

Ministri i Mbrojtjes, Ejup Maqedonci, ka bërë të ditur se kërkesa është adresuar nga komandanti i FSK-së, ndërsa çështja pritet të trajtohet përmes kanaleve të bashkëpunimit ushtarak mes Kosovës dhe SHBA-së.

“Kemi kërkuar nga SHBA-ja të diskutojmë edhe çështjen e helikopterëve”, ka deklaruar Maqedonci.

Sipas tij, kapacitetet ajrore, përfshirë pajisjen me helikopterë, janë pjesë e nevojave të ardhshme të FSK-së dhe synimit për forcimin e aftësive mbrojtëse të Kosovës.

Blerja përmes programit amerikan Foreign Military Sales (FMS) do të nënkuptonte që kërkesa e Kosovës të shqyrtohet nga autoritetet amerikane, përpara se të përcaktohen lloji i helikopterëve, numri dhe vlera e kontratës.

Kosova ka shprehur më herët interesim për helikopterët amerikanë Black Hawk, të cilët do të mund të përbënin një nga opsionet për forcimin e komponentës ajrore të FSK-së.

Megjithatë, në këtë fazë nuk është bërë e ditur se sa helikopterë synon të blejë Kosova, cili model do të përzgjidhet apo kur mund të përfundojë marrëveshja.