​Galica: Brovina ishte luftëtare e UÇK-së, ajo nuk u ndal as kur u burgos

Prishtinë, 18 shtator 2026 11:19

Në Sallën e Kuqe të Pallatit të Rinisë në Prishtinë po mbahet një mbledhje komemorative në nderim të aktivistes Flora Brovina, e cila vdiq më 15 shtator.

Për jetën dhe aktivitetin e saj foli shkrimtari dhe studiuesi Shyqri Galica, i cili e ka njohur nga afër veprimtarinë e tashmë së ndjerës.

Ai tha Brovina nuk e ndali kurrë aktivitetin e saj, madje as kur u burgos nga forcat serbe, gjatë kohës së luftës së Kosovës

Galica: Flora Brovina furnizoi kolegët me armë, uniforma, barna e shërbime

“Ajo ishte një luftëtare e UÇK-së, e cila nga arma në brez deri në kazamatet serbe nuk e ndali veprimtarinë. Me ballë lart nuk u ndal asnjë çast për t’u furnizuar kolegët me armë, me uniforma, me barna e shërbime, me pajisje shëndetësore dhe me kurajën që ishte qendrore në atë kohë. Edhe në liri u dëshmua si veprimtare, humaniste e atdhetare fisnike. Duke qenë shpesh krah të saj me shokë e shoqe të tjera, veprën e Dr. Flora Brovinës e njohim nga afër, ndaj pikëllimi ynë në këto çaste të dhimbjes na bën krenarë që patëm njërën nga nënat e motrat tona, padyshim që kurdoherë u gjend në ballë të refleksioneve dhe situatave, duke mos kursyer asgjë për ditën që gëzojmë sot, për lirinë e atdheut.” U shpreh Galica.

Brovina do të varrohet sot në Arbëri të Prishtinës.