Kosova ofron mbështetje për Shqipërinë dhe Malin e Zi për përballimin e zjarreve

Prishtinë, 14 gusht 2026 14:07

Ministri në detyrë i Mbrojtjes i Kosovës, Ejup Maqedonci, ka shprehur gatishmërinë e institucioneve të Kosovës për t’u ofruar ndihmë Shqipërisë dhe Malit të Zi, të cilat po përballen me zjarre në zona të ndryshme të territoreve të tyre.

Maqedonci ka bërë të ditur se u ka përcjellë homologëve të tij në Shqipëri dhe Mal të Zi gatishmërinë e Ministrisë së Mbrojtjes për të vënë në dispozicion kapacitetet që Kosova ka në dispozicion për përballimin e situatës.

“Republika e Kosovës mbetet e gatshme të kontribuojë në mbështetje të autoriteteve përkatëse të Shqipërisë dhe Malit të Zi, nëse një ndihmë e tillë vlerësohet e nevojshme”, thuhet në deklaratën e Maqedoncit.

Ai ka theksuar rëndësinë e solidaritetit dhe bashkëpunimit ndërmjet vendeve në situata të tilla, duke bërë të ditur se Ministria e Mbrojtjes, Forca e Sigurisë së Kosovës dhe institucionet e tjera janë të gatshme të ofrojnë mbështetje aty ku kapacitetet e Kosovës mund të jenë të dobishme.

“Ministria e Mbrojtjes, Forca e Sigurisë së Kosovës dhe institucionet e tjera të Republikës së Kosovës mbeten të gatshme të ofrojnë mbështetje dhe të kontribuojnë aty ku kapacitetet tona mund të jenë të dobishme”, thuhet në deklaratë.