4.1 milionë euro për rehabilitimin e skarpateve në autostradën “Ibrahim Rugova”

Prishtinë, 11 gusht 2026 17:33

Një investim prej 4.1 milionë eurosh po realizohet për rehabilitimin e segmenteve të skarpateve përgjatë autostradës “Ibrahim Rugova”, në një gjatësi që shtrihet deri në 6 kilometra, me synim rritjen e sigurisë dhe trajtimin afatgjatë të problemeve në këto pjesë të autostradës.

Punimet janë duke u monitoruar nga afër në terren, ndërsa gjatë vizitës në segmentet ku po zhvillohen ndërhyrjet është diskutuar me operatorët për sfidat dhe mënyrën e trajtimit të skarpateve.

Ministri në detyrë i Infrastrukturës, Dimal Basha ka thënë se fokusi kryesor i projektit është që rehabilitimi të jetë i qëndrueshëm dhe permanent, në mënyrë që të shmangen problemet e përsëritura dhe të garantohet siguri më e madhe për të gjithë shfrytëzuesit e autostradës.

Ekipet përgjegjëse po monitorojnë në baza ditore ecurinë e punimeve dhe po bashkëpunojnë me operatorët dhe akterët e tjerë të përfshirë, me qëllim që ndërhyrjet të përfundojnë sa më shpejt, por duke garantuar cilësi dhe zgjidhje të qëndrueshme.

Investimi synon kështu jo vetëm rehabilitimin e segmenteve problematike, por edhe parandalimin e dëmtimeve të ardhshme dhe përmirësimin e sigurisë në një nga akset kryesore rrugore të vendit.