Policia pohon se ka dyshime për zjarrvënie të qëllimshme në shtëpinë e familjes Berisha në Zveçan

Zveçan, 5 gusht 2026 08:29

Shtëpia e familjes Berisha në Zveçan, e cila po rinovohej pasi familja ishte rikthyer në pronën e saj pas 27 vitesh, është përfshirë nga zjarri në orët e para të së hënës. Rasti po hetohet nga Policia e Kosovës si zjarrvënie e dyshuar, ndërsa autoritetet nuk kanë përjashtuar mundësinë që zjarri të jetë shkaktuar qëllimisht.

Zëdhënësi i Policisë së Kosovës për rajonin e Mitrovicës, Erduan Baliqi, ka deklaruar për Veritasinfo se hetuesit policorë, në bashkëpunim me ekspertët, janë duke punuar për zbardhjen e plotë të rastit.

“Jemi duke punuar në këtë drejtim dhe të shohim ku na çojnë përfundimet e hetimeve. Vetë fakti që është zjarrvënie, dyshimet ekzistojnë se djegia është bërë e qëllimshme”, ka deklaruar Baliqi.

Sipas familjes, zjarri ka shpërthyer rreth orës 01:00 pas mesnate, vetëm pak orë pasi ata ishin larguar nga objekti.

Zana Berisha ka bërë të ditur se për dëmtimin e shtëpisë është njoftuar nga Policia e Kosovës në orët e mëngjesit.

Ajo ka theksuar se, pavarësisht sulmit, familja nuk do të heqë dorë nga rikthimi në pronën e saj.

Sipas Berishës, punimet për renovimin e shtëpisë kishin nisur në muajin mars, pasi kishin marrë miratimet e nevojshme nga institucionet, me synimin për t’u vendosur sërish në shtëpinë e tyre pas 27 vitesh.