Gjurmë të krimeve të luftës në Kalludër të Vogël, vazhdojnë gërmimet për varrezën masive

Prishtinë, 3 gusht 2026 21:20

Janë shenja që sinjalizojnë, një zonë krimi.

Ato janë të shpeshta në rrugën që të shpie në fshatin Kalludër e Vogël.

Për të shkuar te vendi ku dyshohet se ka gjurmë të krimeve të kryera afro 3 dekada më parë, tereni është jo i lehtë.

Tash e një javë, kjo rrugë po përshkohet nga njësitet policore, të Institutit të Mjekësisë Ligjore dhe ekspertë të EULEX-it.

Kjo në vazhdën e kërkimeve në varrezën masive.

Për ecurinë e këtyre gërmimeve ka reaguar edhe kryeprokurori i shtetit.

“Kryeprokurori i Shtetit vlerëson lart punën profesionale, përkushtimin dhe angazhimin e të gjitha institucioneve ligjzbatuese të Republikës së Kosovës, të cilat janë të përfshira në rastin e zbulimit të varrezave masive në komunën e Zubin Potokut, ku janë gjetur mbetje mortore dhe dyshohet se ka trupa tjerë të viktimave që i përkasin luftës së fundit në Kosovë”, kanë njoftuar nga Prokuroria.

Gjatë javës së kaluar, gërmimet u vizituan edhe nga krerët institucionalë.