5 milionë euro për sektorin e energjisë, nënshkruhet marrëveshja mes Ministrisë së Financave dhe Bankës Gjermane për Zhvillim

Prishtinë, 22 korrik 2026 16:17

Ministria e Financave siguron grant prej 5 milionë eurosh për modernizimin e rrjetit të transmisionit të energjisë

Ministria e Financave ka nënshkruar një marrëveshje granti në vlerë prej 5 milionë euro me Bankën Gjermane për Zhvillim (KfW), për financim shtesë të projektit “Zhvillimi i sektorit të energjisë – Faza VII: Përmirësimi i Rrjetit të Transmetimit”.

Sipas Ministrisë, fondet do të shërbejnë për realizimin e një sërë investimesh që synojnë zhvillimin dhe modernizimin e infrastrukturës së transmisionit të energjisë elektrike në Kosovë.

Projekti zbatohet nga Operatori i Sistemit, Transmisionit dhe Tregut të Energjisë Elektrike të Kosovës (KOSTT) dhe ka për qëllim forcimin e rrjetit të transmisionit, rritjen e sigurisë dhe besueshmërisë së furnizimit me energji elektrike, si dhe avancimin e integrimit të tregut energjetik.

Ministri i Financave, Hekuran Murati, vlerësoi angazhimin e KOSTT-it në zbatimin e projektit, duke theksuar se financimi shtesë i siguruar nga Qeveria Gjermane përmes KfW-së do të mundësojë realizimin e investimeve prioritare dhe forcimin e qëndrueshmërisë së sistemit energjetik në vend.

Ndërkaq, drejtori i KfW-së për Kosovë, Moritz Remé, riafirmoi gatishmërinë e institucionit që përfaqëson për të vazhduar mbështetjen ndaj Kosovës në modernizimin e sektorit të energjisë.

Edhe kryeshefi ekzekutiv i KOSTT-it, Trim Tërnava, deklaroi se projektet po zhvillohen sipas planifikimit, ndërsa financimi i ri do të krijojë mundësi për modernizimin e mëtejshëm të rrjetit të transmisionit dhe rritjen e kapaciteteve të tij për t’iu përgjigjur nevojave të ardhshme të sistemit elektroenergjetik.

Ministria e Financave theksoi se mbetet e përkushtuar në sigurimin e financimeve për projekte strategjike që forcojnë sigurinë energjetike, zhvillojnë infrastrukturën kritike dhe mbështesin avancimin e qëndrueshëm të sektorit të energjisë në Kosovë.