Komuna e Gjilanit me Park Industrial 150 hektarësh

Prishtinë, 16 korrik 11:26

Ndërtimi i Parkut Industrial në Gjilan po avancon me hapa konkretë, ndërsa Ministria e Industrisë, Ndërmarrësisë, Tregtisë dhe Inovacionit (MINTI) ka zhvilluar konsultimin e dytë publik me komunitetin e biznesit për këtë projekt strategjik.

Faza e konsultimit publik u realizua me pjesëmarrje me mbi 50 përfaqësues biznesesh, për të diskutuar nevojat dhe rekomandimet e komunitetit të biznesit, ku qëllimi kryesor është që parku të jetë realizuar në përputhje me kërkesat reale të sektorit privat.

Sipas Ministrisë së Indrustrisë, Ndërmarrësisë, Tregtisë dhe Inovacionit, prona për ndërtimin e parkut u bart nga Komuna e Gjilanit në pronësi të ministrisë, duke shënuar një tjetër hap të rëndësishëm drejt realizimit të projektit.

Studimi i fizibilitetit tashmë është përfunduar, ndërsa projekti ka hyrë në fazën e hartimit të projektit përfundimtar.

Parku Industrial do të ndërtohet në një sipërfaqe prej 150 hektarësh në fshatin Lipovç i Epërm, pranë magjistrales Prishtinë–Gjilan, duke u renditur ndër zonat industriale më të mëdha në Kosovë.

Projekti synon të krijojë kushte moderne për zhvillimin e industrisë, tërheqjen e investitorëve strategjikë dhe zgjerimin e kapaciteteve prodhuese, ndërsa pritet të hapë vende të reja pune dhe të ndikojë drejtpërdrejt në zhvillimin ekonomik të rajonit të Gjilanit.

Sipas konceptit të prezantuar, Parku Industrial do të zhvillohet mbi parimet e ekonomisë së gjelbër dhe zhvillimit të qëndrueshëm. Ai parashihet të furnizohet me energji nga panelet solare dhe energjia e erës, ndërsa do të integrojë edhe modele të ekonomisë qarkore dhe ripërdorimit të materialeve në proceset industriale.

Gjithashtu, bizneset do të organizohen sipas sektorëve të veprimtarisë, duke krijuar një zonë funksionale dhe konkurruese për prodhim.