Lista Serbe zvarrit zgjedhjen e nënkryetarëve shqiptarë në komunat veriore

Mitrovicë e Veriut, 13 shtator 2026 10:49

Përkundër diskutimeve në Kuvendin Komunal, Mitrovica e Veriut vazhdon të jetë pa nënkryetar për komunitete, pozitë e paraparë me ligj për garantimin e përfaqësimit institucional të komuniteteve joshumicë.

Çështja është ngritur të paktën dy herë në mbledhjet e Kuvendit Komunal, por deri më tani nuk është ndërmarrë ndonjë veprim për plotësimin e kësaj pozite.

Anëtarja e Kuvendit Komunal, Aida Ferati-Doli, thotë se kërkesa është diskutuar në seancë, por nuk është marrë parasysh nga kryetari i komunës.

“Po, e kemi diskutuar dy herë në një mbledhje të seancës. Por nuk është marrë parasysh nga kryetari i komunës”, ka deklaruar Ferati-Doli, për Veritasinfo.

Në ndërkohë, çështja ka marrë edhe vëmendjen e Ministrisë së Administrimit të Pushtetit Lokal.

MAPL u ka kërkuar komunave të Mitrovicës së Veriut, Zveçanit dhe Zubin Potokut që të përmbushin obligimet ligjore për emërimin e nënkryetarëve për komunitete.

Kërkesa e ministrisë vjen në një kohë kur këto tri komuna udhëhiqen nga përfaqësues të Listës Serbe, ndërsa në Mitrovicën e Veriut komuniteti shqiptar vazhdon të mos ketë një përfaqësues në këtë pozitë institucionale.

Nga Iniciativa Qytetare “Mitrovica”, Betim Osmani e konsideron këtë situatë si më shumë se një vonesë administrative. Ai thotë se zvarritja e zgjedhjes së nënkryetarit për komunitete po bëhet qëllimisht nga Lista Serbe.

Sipas tij, mosplotësimi i kësaj pozite i lë shqiptarët dhe komunitetet e tjera joshumicë pa një zë të drejtpërdrejtë në strukturat e komunës dhe dobëson mekanizmin institucional që ligji e ka paraparë pikërisht për mbrojtjen dhe përfaqësimin e tyre.

Kështu, ndërsa MAPL ka kërkuar që obligimi ligjor të zbatohet, mbetet e paqartë se kur Kuvendi Komunal i Mitrovicës së Veriut do ta procedojë dhe miratojë nënkryetarin për komunitete.