Prokuroria Speciale ndalon edhe dy të dyshuar për rastin “Pastrimi”

Prishtinë, 14 korrik 2026 18:37

Prokuroria Speciale e Republikës së Kosovës ka njoftuar se ka ndaluar për 48 orë edhe dy persona të dyshuar në kuadër të hetimeve për rastin e koduar “Pastrimi”, duke e çuar në 11 numrin e të arrestuarve në këtë operacion.

Sipas njoftimit të prokurorisë, me urdhër të prokurorit special janë ndaluar K.V. dhe F.V., të cilët dyshohen për një sërë veprash penale, përfshirë pjesëmarrje ose organizim të grupit kriminal të organizuar, kontrabandim të mallrave në bashkëkryerje, dokumente të rrejshme lidhur me tatimin, shmangie nga tatimi, shpëlarje parash, si dhe mbajtje në pronësi, kontroll ose posedim të paautorizuar të armëve.

Prokuroria bëri të ditur se ndalimi i tyre është ndërmarrë në kuadër të veprimeve procedurale dhe hetimore që po zhvillohen për këtë rast.

Lidhur me të njëjtin operacion, më 1 korrik ishin arrestuar edhe nëntë persona, ndërsa hetimet për rastin “Pastrimi” po vazhdojnë nën drejtimin e Prokurorisë Speciale.