Kamberi dorëzon rezolutë për pozitën e shqiptarëve në Luginën e Preshevës në Kuvendin e Serbisë

Beograd, 28 korrik 2025

Deputeti i vetëm shqiptar në Kuvendin e Serbisë, Shaip Kamberi, ka dorëzuar një rezolutë që synon njohjen dhe përmirësimin e pozitës së shqiptarëve në Luginën e Preshevës. Sipas Kamberit, kjo nismë ka për qëllim adresimin e diskriminimit institucional dhe garantimin e të drejtave të komunitetit shqiptar në Preshevë, Bujanoc dhe Medvegjë.

Në postimin e tij në Facebook, Kamberi tha se rezoluta kërkon që Kuvendi i Serbisë ta njohë realitetin diskriminues ndaj shqiptarëve dhe të angazhohet për përmirësimin e gjendjes së tyre në përputhje me obligimet ndërkombëtare dhe procesin e integrimit në BE.

Ndër problemet kryesore që thekson rezoluta janë: pasivizimi arbitrar i adresave, mosnjohja e diplomave nga Kosova, mungesa e përfaqësimit proporcional në institucionet shtetërore, pengesat në përdorimin zyrtar të gjuhës shqipe dhe mungesa e zhvillimit ekonomik në rajon.

Rezoluta bën thirrje për:

Zbatimin e marrëveshjeve të vitit 2001, 2009 dhe 2013;

Ndërprerjen e pasivizimeve të adresave;

Zbatimin e të drejtave gjuhësore dhe arsimore;

Përfaqësim proporcional në institucione;

Dënimin e gjuhës së urrejtjes;

Krijimin e fondeve për zhvillim me mbështetje shtetërore dhe ndërkombëtare.

Gjithashtu, Kamberi ka propozuar formimin e një trupe parlamentare me përfshirjen e OSBE-së, përfaqësuesve shqiptarë dhe shoqërisë civile, që do të hetojë rastet e pasivizimeve. Ai kërkoi që çështja e Luginës të përfshihet edhe në dialogun Kosovë–Serbi.

Në fund, Kamberi falënderoi deputetët e SDA Sanxhakut, Ahmedin Shkrijel dhe Minela Kalender, për mbështetjen që i dhanë rezolutës për ta futur në procedurë parlamentare.