Kurti: Paga minimale nuk ndryshoi për më shumë se 10 vjet, ne e trefishuam

Prishtinë, 1 korrik 2026 10:58

Nga sot paga minimale në Kosovë do të jetë 500 euro.

Për këtë ka shkruar kryeministri në detyrë, Albin Kurti, i cili ka thënë se gjatë qeverisjes së tij kjo pagë u trefishua, duke shtuar se për më shumë se 10 vjet mbeti e pa ndryshuar.

Kurti ka thënë se nga rritja e pagës minimale do të përfitojnë rreth 150 mijë punëtorë të sektorit privat.

“Paga minimale në vendin tonë ngeli e pandryshuar për më shumë se 10 vjet. 2011 ishte viti i fundit kur ajo u ndryshua. Që prej atëherë ajo mbeti 130 përkatësisht 170 euro (varësisht se a je nën apo mbi 35 vjeç).Ndërkaq, gjatë qeverisjes sonë u ngrit katër herë: nga 130 e 170 euro në 250 euro, mandej në 350 dhe së fundi në 425 euro. E sot paga minimale u bë 500 euro. Prej kësaj rritjeje do të përfitojnë rreth 150 mijë punëtorë të sektorit privat. Pra, për më shumë se një dekadë para qeverisjes tonë paga minimale ishte e ultë dhe e pandryshueshme. Ndërkaq për më pak se gjysëm dekade me ne, kemi trefishim të pagës minimale. Rritjen dhe zhvillimin ekonomik të Republikës sonë do ta përcjellim gjithnjë me shtim të mirëqenies për të gjithë”, ka shkruar Kurti në Facebook.