Vuçiç e vë xhandarmërinë serbe në shërbim të Milan Radoiçiqit dhe Zvonko Veselinoviqit

Beograd, 30 qershor 2026 08:28

Televizioni serb, N1, ka marrë informacion se një pjesëtar i njësisë së Xhandarmërisë së Beogradit, Damljan Vukiçeviq, punon si roje private sigurie për Milan Radoiçiqin (i cili është në listën e zezë të kërkuar nga Interpoli si i dyshuar për organizimin dhe pjesëmarrjen në një sulm të armatosur në Banjskë), si dhe dikur ka punuar si roje sigurie për anëtarët e familjes së tij. N1 gjithashtu siguroi informacion se një anëtar i njësisë së Xhandarmërisë së Beogradit, Nikola Milutinoviq, punon si anëtar i sigurisë për objektet në Golia që janë në pronësi të Zvonko Veselinoviqit, i cili është nën sanksionet e SHBA-së dhe Britanisë së Madhe.

Sipas autoriteteve të Kosovës, Milan Radoiçiq kërkohet si i dyshuar për organizimin dhe pjesëmarrjen në sulmin e armatosur në Banjskë, në të cilin u vra pjesnëtari i Policisë së Kosovës, Afrim Bunjaku, si dhe tre pjesëtarë të grupit të armatosur serb.

Pas ngjarjes, vetë Milan Radoiçiq mori publikisht përgjegjësinë për organizimin e grupit dhe përgatitjet logjistike të sulmit, duke pretenduar se nuk e bëri këtë me urdhër të autoriteteve në Beograd.

Zvonko Veselinoviq është nën sanksionet e Shteteve të Bashkuara të Amerikës, sepse OFAC dyshon se ai është udhëheqësi i një grupi të organizuar kriminal. Ata dyshojnë se grupi i tij, sipas pretendimeve të OFAC, mori pjesë në një skemë të madhe për të korruptuar zyrtarët e sigurisë serbe dhe të Kosovës, se qëllimi i asaj skeme ishte të lehtësonte tregtinë e paligjshme të mallrave, parave, narkotikëve dhe armëve midis Serbisë dhe Kosovës. Veselinoviq dyshohet se ka përdorur korrupsionin dhe financimin e aktiviteteve politike me qëllim mbrojtjen e interesave të grupit të tij që nga viti 2017.

Vëllezërit Zvonko dhe Zharko Veselinoviq ishin në listën e 16 individëve dhe 24 subjekteve nga Evropa dhe vendet e Hemisferës Perëndimore, të cilat u sanksionuan nga Departamenti i Thesarit i SHBA-së për dyshime për dhënie ryshfeti politikanëve, pastrim parash dhe kontrabandë.