Mitrovica funksionalizon shërbimin për ndërhyrje të vogla kirurgjike në Qendrën Kryesore të Mjekësisë Familjare

Mitrovicë, 27 qershor 2026 20:20

Nga data 29 qershor 2026, në objektin e Qendrës Kryesore të Mjekësisë Familjare “Dr. Nexhat Çuni” në Mitrovicë do të nisë ofrimi i shërbimeve esenciale kurative dhe ndërhyrjeve të vogla kirurgjike.

Sipas njoftimit të Drejtorisë për Shëndetësi, qytetarët do të kenë në dispozicion shërbime të kirurgjisë së vogël, të cilat përfshijnë përpunimin, pastrimin dhe fashimin e plagëve, si dhe trajtimin e lëndimeve të lehta trupore.

Shërbimi do të ofrohet nga e hëna deri të premten, në intervalin kohor nga ora 08:00 deri në 13:00, në kuadër të Departamentit të Mjekësisë Familjare të Qendrës Kryesore të Mjekësisë Familjare.

Sipas Drejtorisë për Shëndetësi, funksionalizimi i kësaj dhome paraqet një zgjerim të shërbimeve që ofron kujdesi parësor shëndetësor dhe synon të lehtësojë qasjen e pacientëve që kanë nevojë për trajtime bazike kirurgjikale, pa pasur nevojë të drejtohen në nivele më të larta të sistemit shëndetësor.