Aksione inspektuese për shitjen e cigareve elektronike në afërsi të shkollave

Prishtinë, 24 qershor 2026 19:27

Inspektorati Qendror i Tregut në kuadër të Ministrisë së Industrisë, Ndërmarrësisë, Tregtisë dhe Inovacionit, ka zhvilluar aksione inspektuese me qëllim të parandalimit dhe luftimit të shitjes ilegale të cigareve elektronike për personat e mitur.

Gjatë pjesë së parë të muajit qershor, këto inspektime janë fokusuar kryesisht në bizneset që operojnë në afërsi të shkollave.

“Kontrollet janë realizuar në komunat e Prishtinës, Prizrenit, Gjilanit, Vushtrrisë, Ferizajt dhe Vitisë, ku inspektorët kanë verifikuar respektimin e Ligjit Nr. 04/L-156 për Kontrollin e Duhanit lidhur me shitjen e produkteve të duhanit dhe produkteve të ngjashme. Shkeljet e evidentuara gjatë këtyre inspektimeve janë në procedurë trajtimi dhe do të ndiqen sipas dispozitave ligjore përkatëse”, thuhet në njoftim.

Tutje bëhet e ditur se Inspektorati do të vazhdojë me aksione të ngjashme në të gjithë territorin e Kosovës.