Mitrovica nis instalimin e kamerave të sigurisë, synon mbulimin e të gjithë qytetit deri në fund të vitit

Mitrovicë, 24 qershor 2026 12:44

Komuna e Mitrovicës ka nisur instalimin e kamerave të sigurisë, duke paralajmëruar zgjerimin e këtij sistemi në të gjithë qytetin deri në fund të vitit 2026.

Kryetari i Komunës së Mitrovicës, Faton Peci, ka bërë të ditur se projekti ka filluar nga objekti i komunës dhe se në muajt në vijim do të vazhdojë me shtrirjen e kamerave në hapësira të tjera publike në qytet.

Sipas tij, qëllimi kryesor i këtij investimi është rritja e sigurisë së qytetarëve dhe krijimi i një ambienti më të sigurt në gjithë territorin e komunës.

Peci ka theksuar se, pavarësisht sfidave të sigurisë me të cilat është përballur Mitrovica në të kaluarën, qyteti nuk ka pasur deri më tani një sistem të mirëfilltë të kamerave të sigurisë. Ai e ka cilësuar këtë si një paradoks, duke nënvizuar nevojën për investime të tilla në interes të rendit dhe sigurisë publike.

Projekti do të zbatohet në faza, me synimin që deri në fund të vitit të sigurohet mbulim më i gjerë i qytetit me kamera vëzhguese, duke ndihmuar institucionet përgjegjëse në parandalimin dhe zbardhjen e rasteve të ndryshme.