Krasniqi: Miratuam vendimin për 1 milion euro në 4 projekte infrastrukurore

Prishtinë, 24 qershor 2026 11:16

Ministri në detyrë i Administrimit të Pushtetit Lokal, Elbert Krasniqi tha se Qeveria e Kosovës në mbledhjen e sotme miratoi vendimin për rialokimin e mjeteve buxhetore për katër projekte infrastrukturore në vlerë prej 1 milion euro.

“Projekti i parë është ai i rindërtimit të urës Sitnica në Komunën e Mitrovicës së Jugut në vlerë prej 400.000 euro. Projekti i dytë është rregullimi i kanalizimit dhe asfaltimit në qytet dhe në fshatrat e Komunës së Shtimes me vlerë prej 300.000 euro. Projekti i tretë është rivitalizimi i zonave publike të infrastrukturës së rekreacionit malor në Komunën e Pejës në vlerë prej 300.000 euro. Dhe projekti i katërt, ndërtimi i sallës së jashtme sportive në shkollën ‘Mustafa Dumoshi’ në Dumosh në Komunën e Podujevës në vlerë prej 50.000 euro”, tha ai gjatë konferencës për media.

Krasniqi paralajmëroi që në ditët në vijim do të ketë edhe një ndarje në vlerë prej mbi 3 milionë euro për pesë komunat e tjera, të cilat janë fitueset e grantit të performancës për vitin 2025.

Krasniqi gjatë konferencës ka konfirmuar mbështetjen e grupit multietnik ndaj Lëvizjes Vetëvendosje për formimin e institucioneve të reja.

“Ajo çka unë mund të them është që grupi multietnik, që është i përbërë prej tetë ose nëntë deputetëve, janë të gatshëm edhe të interesuar që sa më parë, bashkë me fituesin e zgjedhjeve, të shkojnë dhe t’i formojnë institucionet e Republikës së Kosovës. Kështu që kjo garanton një numër të mjaftueshëm për votimin e qeverisë së re të Republikës së Kosovës”, tha ai.