Policia në veri zbulon armë, municion dhe pajisje të tjera ilegale në tri lokacione në Zubin Potok

Prishtinë, 22 qershor 2026 10:09

Policia e Kosovës ka konfiskuar armë, sasi të konsiderueshme municioni dhe pajisje të tjera të paligjshme gjatë tri aksioneve të ndara të realizuara në komunën e Zubin Potokut.

Sipas njoftimit të Drejtorisë Rajonale të Policisë në Mitrovicën e Veriut, aksionet u zhvilluan më 21 qershor pas pranimit të informatave nga qytetarët se në disa lokacione mund të fshiheshin armë dhe mjete të tjera ilegale.

Në rastin e parë, njësitë policore kontrolluan një objekt në fshatin Presek, që shërbente si stallë për ushqimin e bagëtive. Aty u gjetën dhe u konfiskuan një pushkë M48, pesë karikatorë të kalibrit 7.62 milimetra, 151 fishekë të të njëjtit kalibër, pjesë të uniformës së kamufluar dhe bateri ndriçuese.

Në një kontroll tjetër të kryer po në fshatin Presek, policia sekuestroi një pushkë M48, 74 fishekë të së njëjtës armë si dhe 254 fishekë të armës së gjatë të kalibrit 7.62 milimetra.

Ndërkaq, në rastin e tretë, policia kontrolloi një objekt të pabanuar në fshatin Qeçevë. Gjatë aksionit u gjetën një pushkë M48 me bajonetë, 44 fishekë të kalibrave të ndryshëm, dy makina për mbushjen e fishekëve të armëve të gjuetisë, rreth 200 gramë barut dhe rreth dy kilogramë sfera metalike që përdoren për mbushjen e fishekëve.

Të gjitha veprimet janë ndërmarrë në koordinim me Prokurorin e Shtetit, i cili ka urdhëruar inicimin e rasteve për veprën penale “Mbajtje në pronësi, kontroll ose posedim të paautorizuar të armëve”.

Policia bëri të ditur se deri në këtë fazë të hetimeve nuk ka persona të arrestuar, ndërsa ka falënderuar qytetarët për bashkëpunimin dhe ndarjen e informatave që ndihmojnë në ruajtjen e rendit dhe sigurisë publike.