Podujeva kremton Ditën e Çlirimit, por me kujtimin e 431 viktimave të luftës

Podujevë, 19 qershor 2026 20:02

19 qershori shënon një nga datat më të rëndësishme në historinë e Komunës së Podujevës – Ditën e Çlirimit. Në këtë ditë, qytetarët e Llapit kujtojnë fundin e një periudhe të rëndë të luftës dhe sakrificën e madhe që u bë për lirinë e Kosovës.

Lufta la pasoja të rënda në këtë komunë. Sipas të dhënave të evidentuara, sipas Këshilli për Mbrojtjen e të Drejtave dhe Lirive të Njeriut, gjatë viteve 1998-1999 në territorin e Podujevës, u vranë rreth 431 persona. Në mesin e tyre ishin 105 dëshmorë, të cilët ranë në altarin e lirisë, ndërsa fati i 49 personave të zhdukur ende mbetet i pazbardhur plotësisht, duke lënë plagë të hapura për familjet e tyre dhe për mbarë shoqërinë.

Masakrat, dëbimet dhe shkatërrimet e kryera gjatë luftës prekën pothuajse çdo familje në rajonin e Llapit. Për shumë banorë, kujtimet e asaj periudhe mbeten të gjalla, ndërsa kërkimi për drejtësi dhe zbardhjen e fatit të të zhdukurve vazhdon edhe sot.

Dita e Çlirimit nuk është vetëm një datë historike për Podujevën, por edhe një moment reflektimi për brezat e rinj, që të mos harrojnë sakrificën e qindra qytetarëve që humbën jetën dhe të atyre që ende figurojnë të zhdukur. Liria e gëzuar sot mbetet dëshmia më e fortë e qëndresës dhe sakrificës së banorëve të kësaj komune.