Përfundon numërimi në të gjitha QKN-të, KQZ vazhdon me votat me postë dhe ato me kusht

Prishtinë, 13 qershor 2026 20:28

Është përmbyllur procesi i verifikimit dhe numërimit të votave në të gjitha Qendrat Komunale të Numërimit (QKN) në Kosovë, ka konfirmuar zëdhënësi i Komisioni Qendror i Zgjedhjeve, Valmir Elezi.

Sipas tij, të shtunën në orën 19:00 ka përfunduar procesi edhe në Qendrën Komunale të Numërimit në Prishtinë, ku janë proceduar të gjitha 262 vendvotimet e komunës.

“Në total janë proceduar 2,498 vendvotime në të gjitha Qendrat Komunale të Numërimit, që përfaqësojnë 100 për qind të vendvotimeve”, ka bërë të ditur Elezi.

Megjithatë, procesi zgjedhor ende nuk ka përfunduar. Në Qendrën e Numërimit dhe Rezultateve tashmë po vazhdon numërimi i fletëvotimeve të ardhura përmes postës, ndërsa në fazat e ardhshme do të numërohen edhe votat me kusht dhe ato të personave me nevoja të veçanta.

KQZ ka nisur të premten në mbrëmje numërimin e votave me postë, proces që pritet të zgjasë disa ditë. Sipas të dhënave të institucionit, nga 23 kutitë postare të hapura për këtë formë votimi janë tërhequr mbi 85 mijë e 700 pako të supozuara me fletëvotime, shumica e të cilave tashmë janë verifikuar dhe janë gati për numërim.

Ndërkohë, po bëhen përgatitjet për numërimin e votave me kusht dhe atyre të personave me nevoja të veçanta. Në 52 vendvotime me kusht janë evidentuar 8,751 votues, ndërsa për votimin përmes ekipeve mobile janë regjistruar 3,144 votues.

Para nisjes së këtij procesi, KQZ po kryen skanimin dhe krahasimin e listave të votuesve të përdorura në vendvotimet e rregullta, me qëllim identifikimin e rasteve të mundshme të votimit të dyfishtë.

Përfundimi i këtyre procedurave do t’i hapë rrugë shpalljes së rezultateve përfundimtare të zgjedhjeve.