Tensione në qendrën e votimit “Sveti Sava” për shkak të një materiali të lidhur me Listën Serbe

Mitrovicë e Veriut, 7 qershor 2026 20:41

Një incident është raportuar të dielën rreth orës 18:30 në qendrën e votimit 3805/10, e vendosur në shkollën “Sveti Sava”, ku si pasojë janë shoqëruar në stacionin policor dy persona.

Sipas informacioneve të siguruara, në mesin e të ndaluarve janë një anëtar i komisionit zgjedhor dhe Nenad Vukmiroviç, anëtar i partisë “Liri, Drejtësi dhe Mbijetesë”. Të dy po japin deklaratat e tyre në polici lidhur me rrethanat e incidentit.

Burimet e VeritasInfo bëjnë të ditur se Vukmiroviç ka vërejtur një material të hapur pas ekranit të votimit, ku në një faqe ishin të paraqitur kandidatët e Listës Serbe. Sipas tij, prania e këtij materiali mund të interpretohej si favorizim i kësaj force politike brenda qendrës së votimit.

Pas konstatimit të tij, Vukmiroviç ka kërkuar që rasti të evidentohej në procesverbalin e komisionit zgjedhor. Megjithatë, sipas pretendimeve të tij, kërkesa është kundërshtuar nga anëtarët e komisionit, çka ka shkaktuar tensione dhe grumbullim të personave në vendngjarje.

Policia e Kosovës ka reaguar menjëherë për të vënë situatën nën kontroll, ndërsa rasti është duke u trajtuar nga organet kompetente.

Deri më tani nuk ka informacione për persona të lënduar, ndërsa autoritetet pritet të sqarojnë detajet e incidentit pas përfundimit të procedurave dhe marrjes së deklaratave.

Policia e Kosovës është kontaktuar nga VeritasInfo, por deri më tani nuk është konfirmuar rasti në fjalë.