Rreth 20 mijë maturantë pritet t’u nënshtrohen provimit në Testin e Maturës Shtetërore

Prishtinë, 1 qershor 2026 12:41

Ka nisur procesi i aplikimit për Testin e Maturës Shtetërore, ku këtë vit pritet të marrin pjesë rreth 20 mijë maturantë nga e gjithë Kosova.

Sipas njoftimit, aplikimi do të zhvillohet përmes platformës online dhe do të qëndrojë i hapur deri më 12 qershor. Përmes këtij procesi, maturantët do të regjistrohen për t’iu nënshtruar provimit që konsiderohet një nga testimet më të rëndësishme në përfundim të arsimit të mesëm të lartë.

Testi i Maturës Shtetërore do të mbahet më 20 qershor në afatin e parë, ndërsa afati i dytë është paraparë të organizohet më 29 gusht. Sipas të dhënave të Ministrisë së Arsimit, këtë vit pritet të marrin pjesë mbi 18 mijë maturantë të rinj, si dhe kandidatë nga vitet paraprake që nuk e kanë kaluar provimin.

Provimi do të organizohet brenda një dite dhe do të përfshijë tri lëndë të përgjithshme – Gjuhë Shqipe, Matematikë dhe Gjuhë Angleze – si dhe një lëndë zgjedhore që përzgjidhet nga vetë nxënësit.

Ndërkohë, autoritetet arsimore kanë bërë të ditur se këtë vit procesi do të zhvillohet në bazë të Ligjit të ri për Maturën Shtetërore, i cili i jep kompetenca shtesë Inspektoratit të Arsimit për mbikëqyrjen e mbarëvajtjes së testimit dhe garantimin e integritetit të procesit.

Institucionet përgjegjëse kanë ftuar të gjithë maturantët që të përfundojnë aplikimin brenda afatit të paraparë, në mënyrë që të shmangen vonesat dhe problemet teknike para ditës së testimit.