Policia parandalon kontrabandën e 27 deleve dhe 4 qengjave nga Serbia

Prishtinë 26 Maj 2026 13:54

Policia e Kosovës ka parandaluar kontrabandën e 27 deleve dhe 5 qengjave pa matrikula në vesh të cilat dyshohet se janë kontrabanduar nga territori i Serbisë për në Kosovë. Në njoftimin e Policisë së Kosovës bëhet e ditur se është ndaluar një person, por që më pas është liruar në “procedurë të rregullt”.

E plotë:
Policia e Kosovës, respektivisht Drejtoria Rajonale e Policisë Kufitare – Lindje në kuadër të angazhimeve policore për ruajtjen e kufirit shtetëror dhe parandalimin e aktiviteteve të kundërligjshme ndërkufitare, më datë 26.05.2026, në fshatin Dumnicë, ka parandaluar një rast të kontrabandimit me mallra. Nga njësitë policore janë ndalur dy automjete të dyshuara me targa vendore, në të cilat janë gjetur të ngarkuara 27 dele dhe 4 qengja pa matrikula në vesh, të cilat dyshohet se janë kontrabanduar nga territori i Serbisë në territorin e Republikës së Kosovës. Lidhur me rastin është arrestuar një i dyshuar mashkull kosovar i cili pas intervistimit është liruar në procedurë të rregullt, ndërsa me autorizim të prokurorit kompetent është iniciuar rasti “kontrabandim me mallra”. Automjetet dhe malli janë dërguar në terminal doganor për procedura të mëtejme.