Vushtrria e Feronikeli kthehen në Superligë, Liria e Dinamo në barazh

Prishtinë, 23 maj 2026 18:32

Vushtrria është kthyer në elitën e futbollit të Kosovës direkt, pas fitores së madhe ndaj rivalit direkt për Superligë, Vëllaznimit.

Me rikthim të rezultatit të shtunën në stadiumin me terren sintetik në Gjakovë, Vushtrria fitoi 3:1 ndaj Vëllaznimit. Skuadra gjakovare me këtë disfatë, e humb mundësinë edhe për ta kërkuar Superligën nëpërmjet barazhit.

Vushtrria e fitoi kampionatin me 75 pikë, dhe e la prapa Feronikelin 74 me 74 pikë.

Vëllaznimi edhe në edicionin tjetër do të bëj gara në kategorinë e dytë të futbollit kosovar, pasi e përfundoi kampionatin me 70 pikë, një më pak se Liria e treta dhe Dinamo e pozitës së katërt. Liria e mposhti Dinamon 5:1. Vendi i tretë e i katërt e luajnë barazhin e Ligës së Parë, e më pas luhet ndeshja e barazhit për inkuadrim në Superligë, me skuadrën e vendit të tetë që përfundon në Superligë. Liria përfundoi mbi Dinamon pasi i ka dy fitore në ndeshjet e ndërsjella.

Vëllaznimi kaloi në epërsi me golin e Dardan Jasharit në minutën e 13-të.

Skuadra e udhëhequr nga trajneri Armend Dallku i barazoi shifrat në minutën e 51-të.

Urim Statovci e devijoi topin drejt portës, kurse atë nuk e largoi si duhet nga vija e portës Ardi Shala, dhe topi përfundoi në rrjetë për 1:1.

Për 2:1 nga penalltia në të mirë të Vushtrrisë shënoi Urim Statovci, në minutën e 77-të.

Gjyqtari Genc Nuza dha penallti pas rishikimit të situatës në VAR dhe pa prekje me dorë. I pagabueshëm ishte Statovci.

Për 3:1 shënoi edhe zëvendësuesi Erjon Krasniqi, në minutën e 81-të. Krasniqi e zëvendësoi Statovcin dhe e vendosi fitoren.

Vushtrria e mbylli ndeshjen me një futbollist më pak në fushë, pas përjashtimit me të kuq të futbollistit Lis Demiri, në minutën e katërt të kohës shtesë.

Vushtrria ra nga Superliga në edicionin 2020/21.

Më pas dështoi të kthehej në elitë nëpërmjet barazhit, pasi humbi nga Malisheva në edicionin 2021/22.

Në barazh për inkuadrim në Superligë, Vushtrria humbi edhe nga Llapi në edicionin 2024/25.

Feronikeli 74 është kthyer në elitën e futbollit kosovar.

Në xhiron e fundit, Feronikeli 74 të shtunën e mposhti në Prishtinë skuadrën e Ramiz Sadikut, 2:0.

Me fitore, Feronikeli 74 i udhëhequr nga trajneri Granit Begolli, ka grumbulluar 74 pikë.

Kreshnik Bahtiri në minutën e 20-të dhe Avni Selmani në minutën e 80-të i shënuan golat e fitores.

Feronikeli 74 ra nga Superliga në edicionin 2024/25, pasi përfundoi në vendin e fundit, përkatësisht të dhjetë, me 15 pikë.

Por, rikthehet pas një edicioni të kaluar në kategorinë e dytë të futbollit kosovar.