Sveçla: Gënjeshtra është interes nacional serb – Vuçiq dhe shpura e tij po mundohen t’i qëndrojnë kësaj

Sveçla: Gënjeshtra është interes nacional serb – Vuçiq dhe shpura e tij po mundohen t’i qëndrojnë kësaj

Prishtinë, 23 korrik 2025

Ministri i Punëve të Brendshme në detyrë, Xhelal Sveçla, ka reaguar ndaj deklaratave të zyrtarëve serbë lidhur me një rast pronësor në veri të Kosovës, duke i cilësuar ato si pjesë e një fushate të rrezikshme dezinformimi, të udhëhequr nga presidenti i Serbisë, Aleksandër Vuçiq.

Përmes një postimi në rrjetet sociale, Sveçla ka ndarë edhe reagimin zyrtar të Agjencisë Kosovare për Krahasim dhe Verifikim të Pronës (AKKVP), e cila ka sqaruar se prona për të cilën bëhet fjalë – që i përket familjes Shipolli – është njohur ligjërisht që nga viti 2005 dhe se të gjitha veprimet e agjencisë janë në përputhje me vendimet përfundimtare të institucioneve të drejtësisë.

“Serbia po përpiqet të manipulojë opinionin publik me gënjeshtra të fabrikuara”, ka shkruar Sveçla, duke e lidhur këtë praktikë me ideologjinë nacionaliste serbe të shekullit të kaluar.

“Siç ka deklaruar njëri nga ideologët kryesorë të krimeve serbe në fund të shekullit të kaluar – Dobrica Çosiq – se gënjeshtra është interes nacional serb, edhe Vuçiq dhe shpura e tij po mundohen me përpikëri t’i qëndrojnë kësaj”, ka shkruar ai.

Në fund të reagimit, Sveçla ka theksuar se në Republikën e Kosovës nuk do të mbizotërojë dezinformimi, por ligjshmëria dhe e vërteta.

“Por kot e kanë. Në Republikën tonë do të mbretërojë jo vetëm e vërteta, por edhe rendi dhe sundimi i ligjit – kurdo dhe kudo”, ka përfunduar ai.