Marta Kos: Serbia nuk mund të ecë drejt BE-së pa zbardhur Banjskën

Prishtinë, 16 maj 2026 07:14

Komisionerja e Bashkimit Evropian për Zgjerim, Marta Kos, i ka rikujtuar Serbisë se përgjegjësia për sulmin terrorist në Banjskë mbetet një prej çështjeve kyçe në rrugën e saj drejt integrimit evropian. Gjatë vizitës në Kosovë, ajo theksoi se mungesa e përgjegjësisë dhe mosndëshkimi i organizatorëve të këtij sulmi nuk mund të anashkalohen nga Bashkimi Evropian.

Kos deklaroi se “moszotimi” i Serbisë lidhur me sulmin terrorist në Banjskë nuk duhet të kalojë pa pasoja politike, duke lënë të kuptohet se kjo çështje do të ndikojë drejtpërdrejt në raportet e Beogradit me Brukselin.

Sulmi në Banjskë, i ndodhur më 24 shtator 2023, konsiderohet nga institucionet e Kosovës dhe Bashkimi Evropian si akt terrorist. Një grup i armatosur serb kishte sulmuar Policinë e Kosovës, ku mbeti i vrarë rreshteri Afrim Bunjaku, ndërsa më pas pati përleshje të armatosura me sulmuesit të cilët u strehuan në manastirin e Banjskës. Përgjegjësinë për organizimin e sulmit e kishte marrë Milan Radoiçiq, ish-nënkryetar i Listës Serbe.

Bashkimi Evropian ka përsëritur disa herë kërkesën që Serbia të bashkëpunojë në hetime dhe të sjellë para drejtësisë përgjegjësit për sulmin. Sipas qëndrimeve të fundit të Brukselit, përparimi i Serbisë në procesin e integrimit evropian lidhet ngushtë edhe me sundimin e ligjit dhe trajtimin e rastit të Banjskës.