Kërkohen masa të rrepta dhe ndëshkime për kompanitë e ndërtimit që s’i respektojnë rregullat për sigurinë e punëtorëve

Prishtinë 2 Maj 2026. 10:02
Drejtoresha e Iniciativës Kosovare për Stabilitet, Brikenë Hoxha, ka bërë thirrje për rritje të ndëshkimeve ndaj kompanive që nuk zbatojnë rregullat për sigurinë në punë, duke theksuar se sektori i ndërtimtarisë mbetet ndër më të rrezikshmit si në Kosovë, ashtu edhe në vendet e zhvilluara.

Sipas saj, kombinimi i rrezikshmërisë së lartë dhe nivelit të madh të informalitetit në këtë sektor krijon një “qark vicioz” që ndikon drejtpërdrejt në uljen e sigurisë së punëtorëve. Hoxha vlerësoi punën e Inspektoratit të Punës për inspektimet e kryera, por shtoi se ato duhet të shtohen edhe më shumë.

Mbështete KOHËN. Ruaje të vërtetën.
Gazetaria profesionale është interes publik. Mbështetja juaj ndihmon që ajo të mbetet e pavarur dhe e besueshme. Kontribuoni edhe ju. 1 euro e bën dallimin.

Ajo kërkoi më shumë kontrolle dhe masa ndëshkuese për kompanitë që shkelin rregullat, duke theksuar se vetëm përmes presionit institucional mund të përmirësohet gjendja në terren.

“Inspektorati i Punës mirë që po i bën këto inspektime, por duhet të sa më shumë inspektime, sa më shumë ndëshkime për ata që nuk i zbatojnë rregullat për sigurinë e punëtorëve”, ka thënë ajo në “60 Minuta” të KTV-së.

Po ashtu, Hoxha nënvizoi rëndësinë e vetëdijesimit si te punëdhënësit, ashtu edhe te punëtorët për përdorimin e mjeteve mbrojtëse, duke theksuar se ato shpëtojnë jetë.

“Është tragjike kur dikush shkon në punë për të siguruar të ardhurat për familjen dhe kthehet në arkivol. 10 vdekje në vendin e punës sivjet kanë emra, nuk janë vetëm numra”, deklaroi ajo.