Sektori i teknologjisë në Kosovë ul ndjeshëm papunësinë e të rinjve

Prishtinë, 2 maj 2026 09:33

Kosova, dikur e përballur me nivele alarmante të papunësisë, sidomos tek të rinjtë, po përjeton një ndryshim të dukshëm falë rritjes së sektorit të teknologjisë informative.

Vite më parë, papunësia e të rinjve në vend arrinte në rreth 60 për qind, duke e renditur Kosovën ndër vendet me normat më të larta në Evropë.

Kjo situatë kishte nxitur emigrimin masiv dhe për një kohë të gjatë ishte konsideruar si një nga sfidat kryesore socio-ekonomike.

Sot, panorama është ndryshe. Me zhvillimin e industrisë së teknologjisë dhe shërbimeve digjitale, janë krijuar mijëra vende të reja pune, duke ndikuar drejtpërdrejt në uljen graduale të papunësisë. Sipas analizave të publikuara nga Bloomberg dhe të dhënave të Institutit të Statistikave të Kosovës (ASK), norma e papunësisë tek të rinjtë ka pësuar rënie të konsiderueshme gjatë viteve të fundit.

Ky trend pozitiv lidhet ngushtë me zgjerimin e kompanive të outsourcing-ut dhe startupeve vendore, të cilat po krijojnë mundësi të reja punësimi për të rinjtë me aftësi në teknologji.

Njohja e gjuhës angleze, mosha e re e popullsisë dhe kostot konkurruese kanë ndikuar që Kosova të bëhet një treg tërheqës për investime ndërkombëtare.

Rritja e punësimit në këtë sektor po ndikon gjithashtu në frenimin e fenomenit të “ikjes së trurit”.

Gjithnjë e më shumë të rinj po zgjedhin të qëndrojnë në vend, duke parë perspektivë reale për zhvillim profesional dhe të ardhura të qëndrueshme.

Raporti i publikuar thekson nevojën për të ruajtur këtë trend, duke investuar në arsim, inovacion dhe në ndërmarrje të reja.

Në një kohë kur shumë vende ende përballen me papunësi të lartë, rasti i Kosovës po dëshmon se sektori i teknologjisë mund të shërbejë si një motor i fuqishëm për zhvillim ekonomik dhe ulje të papunësisë.