Siguria shtetërore në veprim: institucionet zbulojnë dhe dokumentojnë rastin e spiunazhit

Prishtinë, 28 prill 2026 08:51

Bashkëpunimi i ngushtë ndërinstitucional në fushën e sigurisë është dëshmuar sërish si faktor kyç në mbrojtjen e rendit kushtetues dhe interesave shtetërore të Kosovës.

Rasti i fundit i zbuluar i spiunazhit, që përfundoi me dënim të Jelena Gjykanoviq, nga organet e drejtësisë, konsiderohet rezultat i drejtpërdrejtë i koordinimit profesional mes institucioneve të sigurisë dhe inteligjencës.

Prokurori i rastit, Bekim Kodraliu, ka theksuar se sigurimi i provave vendimtare u arrit falë bashkëpunimit të ngushtë ndërmjet institucioneve të sigurisë dhe Agjencisë së Kosovës për Inteligjencë (AKI).

Sipas tij, ky koordinim mundësoi dokumentimin e plotë të veprimtarisë së kundërligjshme dhe vërtetimin e akuzave për spiunazh.

Gjykata Themelore në Prishtinë shpalli fajtore ish-zyrtaren e OSBE-së, Jelena Gjukanoviq, duke e dënuar me gjashtë vjet burgim për veprën penale të spiunazhit. Sipas aktgjykimit, ajo kishte përcjellë informacione sensitive tek shërbimet e huaja, duke rrezikuar sigurinë kombëtare.

Ky rast, sipas njohësve të sigurisë, dëshmon rritjen e kapaciteteve operative dhe analitike të institucioneve të Kosovës, të cilat përmes bashkëpunimit të strukturuar kanë arritur të identifikojnë, hetojnë dhe neutralizojnë aktivitetet që cenojnë rendin kushtetues.

Veçanërisht, roli i AKI-së dhe institucioneve të tjera të sigurisë vlerësohet si vendimtar në mbledhjen e inteligjencës, ndërsa organet e drejtësisë kanë garantuar trajtimin profesional dhe ligjor të rastit deri në përfundim.

Autoritetet kanë ritheksuar se lufta kundër spiunazhit dhe aktiviteteve që cenojnë sigurinë e vendit do të vazhdojë pa kompromis, duke u mbështetur në bashkëpunimin e fortë ndërinstitucional dhe në forcimin e vazhdueshëm të mekanizmave të sigurisë.