Policia e Kosovës forcon kapacitetet operacionale me certifikimin e 44 zyrtarëve të rinj në Njësinë për Reagim të Shpejtë

Prishtinë, 27 prill 2026 17:16

Policia e Kosovës ka dëshmuar edhe një herë përkushtimin e saj të vazhdueshëm në ngritjen e standardeve profesionale dhe forcimin e kapaciteteve operative, përmes certifikimit të 44 zyrtarëve policorë të Njësisë për Reagim të Shpejtë (NJRSH).

Ceremonia e certifikimit u zhvillua më 27 prill 2026, në Kampin e Njësive Speciale në Vrellë, pas përfundimit me sukses të një trajnimi intensiv dyjavor në fushën e “Ballafaqimit me turma”. Ky trajnim kishte për qëllim avancimin e aftësive profesionale të zyrtarëve në menaxhimin e situatave të ndjeshme me turma dhe tubime publike, duke garantuar një qasje të koordinuar, profesionale dhe në përputhje me standardet moderne të sigurisë, thuhet në njoftimin e Policisë së Kosovës, përcjell Veritasinfo.

Procesi i trajnimit u realizua nga instruktorët e Drejtorisë së Njësisë Speciale Operative (DNJSO), përmes Divizionit të Trajnimeve në kuadër të Departamentit të Burimeve Njerëzore, duke reflektuar një qasje të strukturuar dhe sistematike në zhvillimin profesional të stafit policor.

Ky aktivitet është pjesë e një cikli të planifikuar trajnimesh që do të shtrihet në të gjitha tetë rajonet policore të vendit, në përputhje me konceptin nacional për menaxhimin e trazirave qytetare. Një qasje e tillë synon unifikimin e praktikave operative dhe rritjen e gatishmërisë së njësive në nivel vendi.

Me këto investime të vazhdueshme në kapitalin njerëzor dhe në trajnime profesionale, Policia e Kosovës po forcon më tej rolin e saj si garantuese e rendit dhe sigurisë publike, duke dëshmuar gatishmëri dhe profesionalizëm në përballimin e sfidave të sigurisë bashkëkohore.