Kosova bëhet pjesë e programit zyrtar për 250-vjetorin e SHBA-së

Prishtinë, 24 mars 2026 18:53

Kosova është përfshirë në mënyrë zyrtare në programin e shënimit të 250-vjetorit të Shteteve të Bashkuara të Amerikës, duke u bërë vendi i parë jashtë territorit amerikan që merr një rol të tillë në këtë jubile historik.

Lajmin e ka bërë të ditur ish-deputeti i Kuvendit të Kosovës, Faton Bislimi, i cili e ka cilësuar këtë si një moment të veçantë për vendin dhe për raportet me SHBA-të. Sipas tij, projekti “America Inspires Freedom – The Kosovo Story” tashmë është pranuar si pjesë e programit zyrtar nga Komisioni Shtetëror amerikan për shënimin e këtij përvjetori, pas nënshkrimit të një memorandumi mirëkuptimi me iniciativën America250.

Ky zhvillim e vendos Kosovën në agjendën zyrtare të aktiviteteve që do të organizohen në kuadër të jubileut të madh amerikan, duke reflektuar lidhjet e ngushta dhe partneritetin ndërmjet dy vendeve.

Sipas Bislimit, projekti do të përfshijë një sërë aktivitetesh kulturore, diplomatike dhe edukative, të cilat synojnë të promovojnë historinë e Kosovës, si dhe ndikimin që Shtetet e Bashkuara kanë pasur në rrugëtimin e saj drejt lirisë dhe shtetndërtimit.

Ai ka theksuar se kjo nismë nuk është vetëm një projekt simbolik, por një dëshmi konkrete e miqësisë së qëndrueshme Kosovë–SHBA dhe një mundësi për ta prezantuar vendin në skenën ndërkombëtare gjatë një ngjarjeje globale me rëndësi të veçantë.