Trepça rikthen në pronësi një parcelë me vlerë mbi 1.2 milion euro në Prishtinë

Prishtinë, 19 mars 2026 07:18

Ndërmarrja “Trepça” Sh.A. ka vazhduar procesin e lirimit dhe rikthimit të pronave të saj në territorin e Komunës së Prishtinës, duke realizuar së fundmi lirimin e një pjese tjetër të parcelës nr. 73-0, e cila për vite me radhë kishte qenë e uzurpuar.

Sipas njoftimit zyrtar, bëhet fjalë për një sipërfaqe prej rreth 50 ari, me një vlerë të tregut që tejkalon 1.2 milion euro. Ky veprim konsiderohet si një hap i rëndësishëm në drejtim të rikthimit të aseteve të ndërmarrjes dhe forcimit të kontrollit mbi pronat e saj.

Ky zhvillim vjen pas lirimit të mëhershëm të një pjese të së njëjtës parcelë, duke treguar vazhdimësinë e angazhimit institucional për trajtimin e çështjeve pronësore.

Nga “Trepça” Sh.A. theksohet se procesi i rikthimit të pronave do të vazhdojë edhe në të ardhmen, në përputhje me legjislacionin në fuqi dhe në funksion të mbrojtjes së interesit publik.