SHBA kërkon veprim të përbashkët kundër Iranit dhe grupeve të lidhura me të

Prishtinë 17 Mars 2026 8:05

Administrata e Presidentit të SHBA-së, Donald Trump, u ka kërkuar diplomatëve amerikanë jashtë vendit që t’u bëjnë thirrje aleatëve të klasifikojnë Gardën Revolucionare të Iranit dhe Hezbollahun me bazë në Liban si grupe terroriste, duke përmendur një rrezik në rritje të sulmeve, raportoi Reuters.

Direktiva e brendshme e nënshkruar nga Sekretari i Shtetit i SHBA-së, Marco Rubio, iu dërgua të gjitha misioneve diplomatike dhe konsullore të SHBA-së në mbarë botën. Ajo u kërkon diplomatëve amerikanë që t’ua përcjellin mesazhin homologëve të tyre “në nivelin më të lartë të përshtatshëm” deri më 20 mars, duke shtuar se përpjekjet për të avokuar për futjen në listën e zezë të këtyre grupeve duhet të koordinohen me homologët izraelitë.

Administrata Trump po përpiqet të mbledhë aleatët e pavendosur — shumë prej të cilëve nuk ishin të informuar para luftës ajrore SHBA–Izrael, e cila filloi dy javë më parë — për të mbështetur operacionin e saj ushtarak.

Disa aleatë të SHBA-së thanë se nuk kishin plane të menjëhershme për të dërguar anije për të ndihmuar forcat amerikane në zhbllokimin e Ngushticës së Hormuzit, duke hedhur poshtë thirrjen e Trump për të mbajtur hapur këtë rrugë ujore jetike për naftën.

“Me rritjen e rrezikut të sulmeve nga Irani dhe partnerët apo përfaqësuesit e tij, të gjitha qeveritë duhet të veprojnë shpejt për të zvogëluar aftësinë e Iranit dhe grupeve terroriste të lidhura me të për të sulmuar kombet dhe qytetarët tanë”, thuhej në një nga pikat e kabllogramit.

Garda Revolucionare e Iranit është një forcë ushtarake elitare, që ka për qëllim mbrojtjen e qeverisë klerikale shiite të Iranit dhe kontrollon gjithashtu pjesë të mëdha të ekonomisë së vendit. Si Garda Revolucionare, ashtu edhe grupi i armatosur shiit me bazë në Liban, Hezbollahu, janë përcaktuar tashmë si organizata terroriste nga Shtetet e Bashkuara dhe disa vende të tjera.

Kabllogrami nuk jepte detaje për rrezikun në rritje, por përmendte shembuj të Teheranit që sulmon fqinjët e tij në Lindjen e Mesme dhe kërkonte veprime të përbashkëta.

“Ne vlerësojmë se regjimi iranian është më i ndjeshëm ndaj veprimeve kolektive sesa ndaj atyre të njëanshme dhe se presioni i përbashkët ka më shumë gjasa ta detyrojë regjimin të ndryshojë sjelljen e tij sesa veprimet individuale”, thuhej në mesazh.

Ai shtoi se përcaktime të tilla do të rrisnin presionin mbi Iranin dhe do të kufizonin aftësinë e tij për të “sponsorizuar aktivitete terroriste në të gjithë botën”.

“Presidenti Trump është i përqendruar në sigurimin e paqes në Lindjen e Mesme. Garda Revolucionare, Hezbollahu dhe ndërmjetës të tjerë të mbështetur nga Irani po destabilizojnë qeveritë dhe po minojnë paqen rajonale”, tha një zëdhënës i Departamentit të Shtetit të SHBA-së.