Komandanti i KFOR-it përsërit thirrjen: Serbia të luajë rolin e vet në përgjegjësinë për Banjskën

Prishtinë 14 Mars 2026 15:41

Komandanti i KFOR-it, gjeneralmajori Ozkan Ulutash, ka thënë se shtetet anëtare të NATO-s janë ende të shqetësuara për dhunën që ndodhi në vitin 2023 në Banjskë dhe Zveçan, teksa përsëriti thirrjen e Sekretarit të NATO-s se ato presin që autoritetet serbe “të luajnë rolin e tyre” në këtë çështje.

Për mediat serbe ai ka thënë se situata e sigurisë në Kosovë është paqësore dhe nuk theksoi ndryshime nga viti 2023, prej rastit në Banjskë dhe protestave të dhunshme të serbëve në veri.

Mbështete KOHËN. Ruaje të vërtetën.
Gazetaria profesionale është interes publik. Mbështetja juaj ndihmon që ajo të mbetet e pavarur dhe e besueshme. Kontribuoni edhe ju. 1 euro e bën dallimin.

“Nuk kam vërejtur ndryshim të theksuar, por situata është ende e ndjeshme, që është rezultat i problemeve të pazgjidhura”, ka thënë ai, transmeton Danas.

Sipas tij, kur thuhet se situata është e ndjeshme nënkupton se është mjedis i sigurt, por se tensionet politike nuk janë zhdukur.

Sa i përket bashkëpunimit ushtarak mes Kosovës, Kroacisë dhe Shqipërisë, Ulutash ka thënë se transformimi i Forcës së Sigurisë së Kosovës filloi më 2014 dhe e ka mbështetjen e shumë shteteve.

“Anëtarësimi në NATO nuk i parandalon anëtarët e aleancës të implementojnë marrëveshje shtesë në bashkëpunim, përfshirë stërvitjet ushtarake”, theksoi ai.