Komuna e Mitrovicës ndërmerr veprime për mbrojtjen e mjedisit dhe lirimin e hapësirave publike

Mitrovicë, 9 mars 2026 08:20

Komuna e Mitrovica ka ndërmarrë një sërë veprimesh për mbrojtjen e mjedisit, mbrojtjen e konsumatorëve dhe lirimin e hapësirave publike, përmes aksioneve të realizuara nga Drejtoria e Inspekcionit.

Sipas njoftimit zyrtar, sektori i Ndërtimit ka reaguar pas ankesave të qytetarëve lidhur me ndotjen e hapësirave publike nga aktivitetet e disa kompanive ndërtimore, të cilat kishin vështirësuar jetesën e banorëve përreth. Ndërtuesit janë obliguar që brenda 72 orëve të sanojnë gjendjen dhe të pastrojnë hapësirat e ndotura, në të kundërtën do të përballen me masa ligjore sipas legjislacionit në fuqi.

Në kuadër të këtij aksioni, sektori i Transportit Rrugor dhe Telekomunikacionit ka ndërmarrë gjithashtu veprime ndaj disa operatorëve të linjave të kombibusëve, të cilët dyshohet se kanë abuzuar me çmimet e transportit të pasagjerëve pas ndryshimeve të çmimeve të karburanteve në treg. Inspektorët komunalë kanë ndërhyrë për të parandaluar manipulimet dhe abuzimet në dëm të qytetarëve.

Ndërkohë, sektori i Shërbimeve Publike ka vazhduar aksionin për lirimin e hapësirave publike duke larguar pllakatet dhe panot reklamuese të vendosura pa leje. Ky aksion ka nisur nga zona e njohur si Ura e Gjakut dhe nga hyrjet dhe daljet e tunelit në qytet, ndërsa është paralajmëruar se do të shtrihet edhe në pjesë të tjera të qytetit.

Drejtori i Inspekcionit, Mujë Igrishta, u ka bërë thirrje qytetarëve që të bashkëpunojnë me institucionet komunale duke raportuar çdo rast të uzurpimit të hapësirave publike, në mënyrë që të ndërmerren veprimet e nevojshme ligjore për kthimin e tyre në shërbim të qytetarëve.