Leposaviq: Kuvendi Komunal miraton ndryshimin e stemës dhe flamurit të komunës

Leposaviq, 7 mars 2026 09:47

Kuvendi Komunal i Leposaviqit ka miratuar vendimin e propozuar për ndryshimin e simbolit të komunës, konkretisht të stemës dhe flamurit, të cilat ishin miratuar nga qeverisja e mëparshme komunale e udhëhequr nga kryetari Lulzim Hetemi.

Në të njëjtën seancë u diskutua edhe për një rast të raportuar në media lidhur me trajtimin e një të riu nga policia në këtë komunë.

Propozimi për ndryshimin e simboleve të komunës u paraqit nga këshilltarja e Listës Serbe, Iva Milutinoviq.

Vendimi u miratua me 13 vota pro, ndërsa një këshilltar abstenoi.

Gjatë diskutimit për këtë çështje, këshilltari i Iniciativës Qytetare “Rrënjët”, Ivan Vuçkoviq, propozoi që në procesin e hartimit të simboleve të reja të përfshihen ekspertë përkatës, në mënyrë që vendimi të mbështetet në standarde profesionale.

Ai konfirmoi se bëhet fjalë për një iniciativë për ndryshimin e stemës dhe flamurit të komunës.

Sipas procedurës, vendimi i miratuar nga Kuvendi Komunal do t’i dërgohet për shqyrtim Ministrisë së Administrimit të Pushtetit Lokal të Kosovës.

Kujtojmë se më 24 janar 2024, në ndërtesën e komunës së Leposaviqit ishte vendosur tabela me mbishkrimin “Republika e Kosovës”, ndërsa nga shtizat para objektit komunal ishin larguar flamujt e Serbisë dhe të Kombeve të Bashkuara.

Diskutim për një rast të raportuar me policinë

Në seancën e kuvendit u diskutua edhe për një rast të raportuar në disa media serbe lidhur me ndalimin e një të riu në Leposaviq nga Policia e Kosovës.

Sipas raportimeve, familjarët kanë deklaruar se i riu është shoqëruar në një automjet zyrtar policor pas një incidenti të ndodhur disa ditë më parë.

Këto pretendime u ngritën në seancë nga Vladimir Radosavljeviq këshilltar i subjektit Demokracia Serbe në kuvendin komunal. Ai kërkoi që institucionet përgjegjëse të japin sqarime për rastin dhe të trajtojnë shqetësimet e ngritura nga familjarët e të riut.

Nga ana tjetër, kryetari i komunës, Zoran Todiç, bëri të ditur se në një seancë të ardhshme të jashtëzakonshme të kuvendit komunal planifikohet të ftohet edhe komandanti i policisë për të dhënë sqarime lidhur me rastin.

IPK ka nisur hetimet

Lidhur me rastin, autoritetet policore kanë bërë të ditur se janë në dijeni për raportimet. Zëvendëskomandanti i Policisë së Kosovës për rajonin e Veriut, Veton Elshani, deklaroi se policia është informuar përmes kanaleve operative dhe se për rastin është duke u zhvilluar një verifikim fillestar.

Ai shtoi se për çështjen është njoftuar edhe Inspektorati Policor i Kosovës (IPK), i cili ka nisur procedurat përkatëse për shqyrtimin e rastit.