Spitali i Mitrovicës zgjeron shërbimet për diagnostikimin e sëmundjeve hormonale

Mitrovicë, 6 mars 2026 07:33

Në përpjekje për të rritur cilësinë e shërbimeve shëndetësore dhe për të zgjeruar gamën e trajtimeve për pacientët, në Spitalin e Përgjithshëm “Dr. Sami Haxhibeqiri” në Mitrovicë janë zgjeruar shërbimet endokrinologjike për diagnostikimin dhe trajtimin e sëmundjeve hormonale.

Sipas njoftimit të spitalit, në kuadër të Repartit të Internos tashmë ofrohen shërbime të specializuara për diagnostikimin dhe trajtimin e çrregullimeve endokrine nga endokrinologet Dr. Vjollca Selmani dhe Dr. Albiona Dajaku.

Në këtë repart realizohen ekzaminime të detajuara në baza ditore duke përdorur teknologjinë e ultrazërit, me fokus të veçantë në identifikimin e hershëm të ndryshimeve në gjëndrën tiroide dhe monitorimin e vazhdueshëm të pacientëve.

Pas vendosjes së diagnozës, specialistet përcaktojnë hapat terapeutikë dhe ndjekin trajtimin e pacientëve në varësi të gjendjes së tyre shëndetësore. Përveç trajtimit të problemeve të tiroides, ekipi endokrinologjik merret edhe me menaxhimin e pacientëve me diabet, duke ofruar terapi dhe këshillim të vazhdueshëm.

Po ashtu, sipas nevojës, realizohen edhe konsulta specialistike në repartet e tjera të spitalit për pacientët e shtrirë që paraqesin probleme hormonale, duke siguruar një qasje multidisiplinare në trajtim.

Nga Spitali i Mitrovicës theksohet se angazhimi i specialistëve në këtë fushë synon që pacientët të marrin diagnostikimin dhe trajtimin e nevojshëm brenda institucionit, duke kursyer kohë dhe duke rritur sigurinë në trajtimin e sëmundjeve hormonale.