Komuna e Malishevës mbështet projekte për bletari, shpezëtari dhe mekanizëm bujqësor

Malishevë, 5 mars 2026 09:02

Komuna e Malishevës po vazhdon angazhimin për të mbështetur familjet në nevojë dhe për të përmirësuar mirëqenien ekonomike të tyre përmes projekteve në sektorin e bujqësisë.

Në këtë kuadër, Drejtoria për Bujqësi dhe Zhvillim Rural ka shpallur një thirrje publike për mbështetjen e familjeve në nevojë, në bashkëpunim me organizatën humanitare Qatar Charity.

Ky program synon të fuqizojë ekonomikisht familjet përfituese duke i ndihmuar që të zhvillojnë aktivitete bujqësore dhe të krijojnë burime të qëndrueshme të të ardhurave.

Sipas njoftimit zyrtar, përmes kësaj thirrjeje do të mbështeten disa projekte konkrete, si sigurimi i shoqërive të bletëve me nga tetë koshere, furnizimi me moto-kultivatorë, si dhe inkubatorë për zhvillimin e veprimtarive në shpezëtari.

Të drejtë aplikimi kanë familjet që i plotësojnë kriteret e përcaktuara nga Drejtoria për Bujqësi dhe Zhvillim Rural në Malishevë. Të interesuarit mund të marrin informata shtesë dhe të dorëzojnë dokumentacionin e nevojshëm pranë kësaj drejtorie.

Afati për aplikim është hapur më 5 mars dhe do të jetë i vlefshëm deri më 20 mars, në ora 16:00.

Përmes këtij projekti, Komuna e Malishevës synon të krijojë mundësi më të mira për familjet në nevojë, duke kontribuar njëkohësisht në zhvillimin e qëndrueshëm rural dhe në rritjen e aktiviteteve bujqësore në komunë.