Slogane nacionaliste serbe në muret e Ambasadës së Republikës së Kosovës në Berlin

Prishtinë, 4 mars 2026 06:53

Ministria e Punëve të Jashtme e Republikës së Kosovës ka bërë të ditur se në ambientet e jashtme të Ambasadës së Republikës së Kosovës në Berlin të Gjermanisë janë vendosur afishe me përmbajtje fyese dhe slogane nacionaliste në gjuhën serbe, përfshirë mesazhet “Kosova është Serbi” dhe “Jo dorëzim”.

Sipas njoftimit zyrtar, etiketat janë ngjitur në pllakën identifikuese të objektit të ambasadës, duke përçuar, siç thuhet në reagim, mesazhe me konotacione përçarëse dhe propagandistike.

Ministria e ka cilësuar rastin si akt vandalizmi dhe gjuhë urrejtjeje, duke e konsideruar të papranueshëm çdo veprim që cenon integritetin e një misioni diplomatik.

Ambasada e Republikës së Kosovës në Berlin ka njoftuar menjëherë autoritetet gjermane lidhur me incidentin.

Sipas deklaratës, policia gjermane pritet të ndërmarrë hapat e nevojshëm, përfshirë hetimin e plotë të rrethanave dhe identifikimin e personave përgjegjës për këtë veprim.

Në reagimin e saj, Ministria dënon fuqimisht çdo akt vandalizmi dhe çdo përpjekje për të dëmtuar misionet diplomatike të Republikës së Kosovës, duke theksuar se veprime të tilla bien ndesh me normat dhe konventat ndërkombëtare që garantojnë paprekshmërinë e përfaqësive diplomatike.

Tutje, në deklaratë theksohet se Republika e Kosovës mbetet e përkushtuar ndaj promovimit të paqes, dialogut dhe bashkëpunimit ndërkombëtar, duke vazhduar ushtrimin e misionit të saj diplomatik në përputhje me parimet dhe standardet ndërkombëtare.