Dëmtime të përhershme të shikimit” – rreziqet nga përdorimi i papërgjegjshëm i laserëve, Policia në Ferizaj sensibilizon të rinjtë

Prishtinë 28 Shkurt 2026 11:42

Drejtoria Rajonale e Policisë në Ferizaj, përkatësisht njësitë e sektorit dhe policisë në komunitet, në kuadër të projektit “Parandalimi i përdorimit të rrezikshëm të laserëve nga të rinjtë”, kanë realizuar aktivitete sensibilizuese lidhur me këtë çështje.

Aktivitetet janë zhvilluar në të gjitha komunat e rajonit të Ferizajt, përkatësisht në: Ferizaj, Kaçanik, Shtime, Shtërpcë dhe Han të Elezit.

Instruktorët policorë kanë mbajtur ligjërata vetëdijësuese me nxënës të shkollave të mesme të ulëta dhe të mesme të larta, si dhe takime informuese me stafin arsimor dhe këshillat e prindërve lidhur me mbikëqyrjen e fëmijëve në përdorimin e pajisjeve laserike.

Gjithashtu, janë vendosur posterë informues në lokacione me frekuentim më të madh të qytetarëve, me qëllim rritjen e ndërgjegjësimit publik.

Përmes këtyre aktiviteteve dhe materialeve informuese synohet njoftimi i nxënësve, prindërve dhe qytetarëve mbi pasojat dhe rreziqet që mund të shkaktojë përdorimi i pakontrolluar i pajisjeve laserike.

Rikujtojmë se drejtimi i rrezeve laser ndaj personave, automjeteve apo mjeteve ajrore përbën veprim të rrezikshëm dhe të dënueshëm, i cili mund të shkaktojë pasoja serioze për shëndetin (dëmtime të përhershme të shikimit) dhe për sigurinë në komunikacion.