Lirohet hapësira publike mbi lumin “Lushta”, paralajmërohen aksione të reja

Mitrovicë, 25 shkurt 2026 07:27

Komuna e Mitrovicës së Jugut ka ndërmarrë një aksion për largimin e një objekti të ndërtuar pa leje mbi lumin “Lushta”, në kuadër të përpjekjeve për lirimin e hapësirave publike dhe rikthimin e rendit urban.

Aksioni është realizuar nga Drejtoria e Inspekcionit Komunal, e cila ka theksuar se objekti në fjalë kishte mbi dy dekada që ishte ndërtuar në mënyrë të kundërligjshme, duke uzurpuar pronën publike dhe duke penguar rrjedhën normale të lumit.

Sipas autoriteteve komunale, prania e këtij objekti përbënte rrezik të vazhdueshëm, veçanërisht në rast të vërshimeve, pasi bllokimi i rrjedhës së ujit mund të shkaktonte përmbytje dhe të rrezikonte zonat përreth, përfshirë edhe pjesë të qytetit.

Drejtori i Drejtorisë së Inspekcionit Komunal, Mujë Igrishta, deklaroi se nuk do të ketë asnjë kompromis me personat që kanë uzurpuar pronën publike. Ai paralajmëroi se aksione të ngjashme do të vazhdojnë edhe në të ardhmen, deri në lirimin e plotë të të gjitha hapësirave publike dhe garantimin e sigurisë për qytetarët.

Komuna ka ritheksuar se zbatimi i ligjit dhe mbrojtja e interesit publik mbeten prioritet, sidomos kur bëhet fjalë për sigurinë dhe mbrojtjen nga rreziqet natyrore.