Ministri Anushiq: Bashkëpunimi ushtarak me Shqipërinë dhe Kosovën nuk është kërcënim për askënd

Prishtinë, 12 shkurt 2026 20:09

Ministri i Mbrojtjes i Kroacisë, Ivan Anushiq, deklaroi sot në Bruksel se bashkëpunimi ushtarak midis Kroacisë, Shqipërisë dhe Kosovës nuk përbën kërcënim për askënd dhe se synimi i tij është ruajtja e stabilitetit në rajon.

Ai theksoi se Shqipëria është anëtare e NATO-s dhe kandidate për anëtarësim në Bashkimin Evropian, Kosova synon të bëhet pjesë e NATO-s dhe BE-së, ndërsa Kroacia është tashmë anëtare e të dyja organizatave.

Sipas tij, interesat e përbashkëta të këtyre tri vendeve janë stabiliteti dhe siguria e rajonit, e jo paqëndrueshmëria.

Anushiq tha se Kroacia ka edhe një marrëveshje bashkëpunimi në fushën e mbrojtjes me Serbinë, e nënshkruar në vitin 2010, e cila përfshin nëntë fusha bashkëpunimi dhe vazhdon të jetë në fuqi.

Ai shtoi se Kroacia është e gatshme të ndihmojë Shqipërinë dhe Kosovën në rrugën e tyre drejt anëtarësimit në Bashkimin Evropian dhe NATO, por se e njëjta gatishmëri do të ekzistonte edhe për Serbinë, nëse ajo do të zgjidhte rrugën evropiane ose atë të NATO-s.

Ministri kroat theksoi se brenda NATO-s dhe BE-së ekzistojnë dhjetëra marrëveshje dhe deklarata bashkëpunimi, të cilat kanë për qëllim shkëmbimin e njohurive, teknologjive dhe bashkëpunimin në industrinë e mbrojtjes.

“Kurrë nuk kemi qenë kërcënim për askënd, sidomos jo Kroacia, dhe as nuk planifikojmë të jemi. Anëtarësimi ynë në NATO dhe BE na obligon dhe ne as nuk mundemi e as nuk duam të veprojmë ndryshe”, deklaroi Anushiq.

Ministrat e Mbrojtjes të Kroacisë, Shqipërisë dhe Kosovës zhvilluan dje një takim në Shkodër, ku u diskutuan sfidat e sigurisë, thellimi i bashkëpunimit ushtarak, rritja e interoperabilitetit dhe përmirësimi i kapaciteteve mbrojtëse.

Pas këtij takimi u njoftua se gjatë këtij viti do të mbahet ushtrimi i parë ushtarak trilateral në kuadër të deklaratës për bashkëpunim në mbrojtje, e cila ishte dakorduar vitin e kaluar.