FSK dëshmon profesionalizëm të lartë në ushtrimin 36-orësh të kadetëve të QSU-së

Prishtinë, 11 shkurt 2026 11:06

Qendra për Studime Universitare (QSU) ka realizuar me sukses një ushtrim fushor intensiv 36-orësh, gjatë të cilit kadetët e Forcës së Sigurisë së Kosovës zhvilluan trajnim praktik në operacione mbrojtëse, duke demonstruar nivel të lartë profesionalizmi dhe gatishmërie operative.
Ministri i Mbrojtjes së Kosovës, Ejup Maqedonci, ka vlerësuar lart këtë aktivitet, duke theksuar se ushtrime të tilla janë dëshmi e qartë e seriozitetit dhe përkushtimit të FSK-së në ndërtimin e kapaciteteve profesionale.
“Ky ushtrim fushor tregon qartë standardin e lartë të trajnimit dhe disiplinës së kadetëve tanë. QSU po dëshmon se është një institucion i përkushtuar në përgatitjen cilësore të kuadrove të ardhshme të Forcës së Sigurisë së Kosovës,” ka deklaruar Maqedonci.
Gjatë ushtrimit, kadetët u angazhuan në një sërë detyrash operative, përfshirë fortifikimin e pozicioneve mbrojtëse, operacione zbulimi dhe mbrojtjen e zonës, duke vënë në praktikë njohuritë teorike të fituara gjatë studimeve.
Një dimension i veçantë i këtij ushtrimi ishte edhe pjesëmarrja e tre kadetëve nga Kolegji Mbretëror “Saint-Jean” i Kanadasë, të cilët po ndjekin studimet në QSU për një semestër. Sipas ministrit Maqedonci, kjo bashkëpunim ndërkombëtar është dëshmi e besimit dhe respektit që institucionet partnere kanë ndaj FSK-së dhe sistemit të saj arsimor ushtarak.
“Pjesëmarrja e kadetëve nga Kanadaja flet për hapjen, profesionalizmin dhe ndërkombëtarizimin e QSU-së dhe FSK-së. Këto bashkëpunime e forcojnë më tej ushtrinë tonë dhe e rrisin ndërveprueshmërinë me partnerët strategjikë,” ka shtuar ai.
Ky aktivitet, sipas Ministrisë së Mbrojtjes, ka shërbyer për rritjen e gatishmërisë profesionale dhe përmirësimin e aftësive taktike të kadetëve, duke konfirmuar angazhimin e vazhdueshëm të QSU-së dhe FSK-së për standarde të larta trajnimi dhe profesionalizmi në shërbim të sigurisë së vendit.