Viti 2025 u përmbyll me një tjetër hap përpara për N.P. “Ibar-Lepenc” Sh.A.

Mitrovicë, 5 janar 2026 10:01

Të dhënat sipas projeksioneve aktuale për vitin 2025 tregojnë rritje të vazhdueshme, forcim të stabilitetit financiar dhe rezultate që flasin qartë për punën e bërë ndër vite në Ndërmarrjen “Iber Lepenci”

Të hyrat totale për vitin 2025, bazuar në të dhënat aktuale, arrijnë rreth 12.5 milionë euro, që përbën një nivel rekord për kompaninë.

Fitimi për vitin 2025, sipas performancës aktuale, është rreth 2 milionë euro, duke konfirmuar kalimin e plotë nga humbjet e mëdha të viteve të kaluara drejt fitimeve të qëndrueshme.

Në tri aktivitetet kryesore të gjenerimit të të hyrave janë shënuar rezultate rekord:

shitja e ujit të papërpunuar,

shitja e energjisë elektrike,

ujitja e tokës bujqësore.

Tani trendi është i qartë: rritje vjetore, menaxhim më efikas dhe fokus në përgjegjësi financiare.

Natyrisht, gjatë vitit ka pasur edhe sfida të vazhdueshme, veçanërisht rritja e sigurisë së infrastrukturës në veri, temperaturat ekstreme dhe mungesa e reshjeve gjatë verës, si dhe ndërtimi i urave në Mitrovicë, që ndikoi gjithashtu në uljen e rezultatit financiar të ndërmarrjes, pasi niveli i lumit Ibër duhej të ulej në minimum, gjë që pamundësoi prodhimin e energjisë elektrike.

Për vitin e ardhshëm janë paraparë objektiva edhe më ambicioze, investime të shumta në rritjen e kapaciteteve prodhuese dhe, më në fund, fillimi i projektit Lepenc.

N.P. “Ibar-Lepenc” Sh.A. vazhdon përpara, thuhet në komunikatën e drejtorit Faruk Mujka.